Фолксваген се спогодил со австриските тужители за „Дизелгејт“, ќе им плати 23 милиони евра
Автомобилскиот гигант Фолксваген постигнал вонсудска спогодба со австриските клиенти оштетени од скандалот „Дизелгејт“, со која ќе им исплати на оштетените 23 милиони евра, јави агенцијата Франс прес.
Аферата избувна во септември 2015 година, кога американската агенција за животна средина ЕПА ѝ откри на јавноста дека Фолксваген ги „штелувал“ тестовите на издувни гасови на своите возила, за да ги избегне строгите прописи во САД.
Австриското здружение за заштита на потрошувачите ВКИ поднесе 16 тужби во име на десет илјади купувачи на возила Фолксваген, пренесува АФП. Здружението за заштита на потрошувачите барало повеќе од 60 милиони евра од германскиот производител.
Аферата „Дизелгејт“ го чинеше производителот на автомобили повеќе од 30 милијарди евра, а најголемите трошоци беа во САД.
Во Германија, пак, на почетокот на септември започна судењето на поранешниот шеф на Фолксваген, Мартин Винтеркорн поради неговата вмешаност во аферата, но оваа недела беше одложено поради негова повреда. Судот во Брауншвајг најави дека судењето ќе продолжи и следната година.