Филипче ја презеде функцијата претседател на СДСМ, најави период на обединување и реформи
![](https://www.slobodenpecat.mk/wp-content/uploads/2024/07/IMG_2331.jpeg)
Само преку темелни промени ќе ја вратиме довербата кај членовите, за да може да ја освојуваме и довербата кај граѓаните. Ќе водам со пример, ќе обединувам и ќе работам како што ветив, како што се обврзав пред членовите, порача новиот претседател на СДСМ, Венко Филипче кој денеска во седиштето на партијата, ја презеде функцијата од неговиот претходник Димитар Ковачевски.
Како што соопштија од партијата, Ковачевски му честитал на победата и му посакал успех во работата и повторно градење на „победнички СДСМ“. Филипче посочил дека следи период на многу работа, обединување и реформа на СДСМ.
– Процесот нема да биде ниту брз ниту лесен, но освен темелни промени не постои друг начин да ја вратиме довербата кај членовите, за да може постепено да ја освојуваме и довербата кај граѓаните. Ќе водам со пример, ќе обединувам и ќе работам како што ветив, како што се обврзав пред членовите. Сечиј глас ќе биде слушнат. Со честа и отворена комуникација со членството ќе создадеме нова енергија на партијата која ќе ја трансформираме во една ефикасна организација. СДСМ ќе се врати посилна и ќе продолжи да биде мотор на општествениот напредок – рекол Филипче.
Внатрепартиските избори во СДСМ се организираа откако партијата доживеа пораз на парламентарните избори, а Ковачевски си поднесе оставка од претседателската функција на партијата. Изборите се одржаа на 30 јуни, а за Филипче гласаа 9.000 од вкупно излезени 12.600 гласачи или 54 отсто од запишаните 23.000, најмалку во историјата на партијата. Александар Бајдески освои 905, Јован Деспотовски 2.705 и Славјанска Петровска – 190 гласа.