Стапалата можат да откријат многу за нашето здравје, а фармацевтот Ноел Викс наведува дека тие дури можат да предупредат на две сериозни болести – срцеви заболувања и дијабетес, пишува „Мирор“.

„Треба да се грижиме за здравјето на нашите стапала, вклучувајќи ги и ноктите на нозете, бидејќи тоа може да влијае на нашето целокупно здравје и да биде знак за сериозни здравствени проблеми“, рекол Викс.

Секое стапало се состои од 26 коски, 30 зглобови и над 100 мускули, заедно со бројни крвни садови. Крвните садови на прстите се мали, па лесно може да се затнат со маснотии, што е знак за срцеви заболувања. Фармацевтот посочува дека оваа состојба може да се манифестира со симптоми како студени, вкочанети, болни и отечени стапала.

„Задебелување и кршливост на ноктите на нозете исто така може да се појават при срцеви заболувања“, додал тој.

Викс предупреди дека знаците на дијабетес во стапалата може да бидат суптилни и лесно да се пропуштат. Тој советува да внимавате на симптоми како што се пецкање, печење или болка, губење на допир, испукана, сува кожа, плускавци и рани кои бавно (или воопшто не заздравуваат), габични инфекции (вклучувајќи жолти, задебелени нокти) и спортско стапало.