Германскиот актер Гедеон Буркхард, познат на нашата публика по улогите во сериите „Инспектор Рекс“ (Iinspector Rex) и „Кобра 11 – Специјални за автопат“ (Alarm for Cobra 11 – The Motorway Police), утре го слави 55-тиот роденден.

Во последните неколку години тој го привлекува вниманието со својот необичен стил на живот. Имено, тој е во среќна врска со две девојки.

– Не само сексуално, туку имаме балансирана и длабока врска во сите аспекти – изјави претходно Гедеон за германскиот магазин „Бунте“.

Буркхард живее во Берлин со двете девојки Ен-Брит Дитмар и Саша Ведута во простран стан во стара зграда, а подоцна се вселила и неговата мајка Елизабет фон Моло.

Актерот зборуваше за својата девојка Саша во јуни 2022 година. Тој рече дека одлично се согласуваат и дека имаат многу исти желби во животот. Бидејќи таа е Украинка, на почетокот биле во врска на далечина.

– Саша ме посети две недели пред почетокот на војната и потоа, се разбира, не можеше да се врати – рекол тогаш Гедеон.

Инаку, Буркхард освен во сериите „Инспектор Рекс“ и „Кобра 11“ имаше забележителна улога и во филмот на Квентин Тарантино „Неславни копилиња“ (Inglourious Basterds).

Да потсетиме, Буркхард се школувал во Англија, а актерската кариера ја започнал во 1979 година во германскиот филм „Танте Марија“. Тој живеел во САД во текот на 1990-тите, каде што работел на неколку продукции, но ниту една не го направила толку познат како серијата „Инспектор Рекс“. Инаку, Буркхард беше во брак со активистката и организаторка на настани Биргит Канингам, но љубовта не траеше долго.