Полскиот претседател Анджеј Дуда денеска за Би-Би-Си изјави дека одлуката за испраќање авиони во Украина, пред се Ф-16, е многу сериозна и тешка за Варшава. Коментарите на полскиот претседател уследија по минатонеделната турнеја на украинскиот претседател Володимир Зеленски во Европа и лобирањето за дополнителна воена поддршка, вклучувајќи артилерија со долг дострел, муниција, противвоздушна одбрана, ракети и борбени авиони.

Полска е еден од најблиските сојузници на Украина и е свесна за сопствените резерви на оружје. Истакнувајќи дека Полска има помалку од 50 авиони, Дуда оцени дека е сериозен проблем доколку се донираат дури и мал број од нив.

Според полскиот претседател, Полска е членка на НАТО и одлуката за испраќање борбени авиони бара одлука на сојузниците, што значи дека е потребна заедничка одлука, а не на една земја. Потсетувајќи се на изјавата од 2022 година, на почетокот на руската инвазија, Дуда оцени дека испраќањето авиони „би значело воено мешање во украинскиот конфликт“.