Полскиот претседател Анджеј Дуда врши притисок врз Кина да ја засили трговијата со земјите од Централна и Источна Европа. Тој ги нарече економските врски со Пекинг „недоволни”, јавија француски медиуми.

Дуда ги даде коментарите за време на видео конференција со кинескиот претседател Си Џинпинг и регионалните лидери.

Тој нагласи дека сака „повидливи и взаемно корисни резултати во економската сфера”.

Полскиот претседател навести дека тие резултати можат да дојдат главно во форма на зголемен кинески увоз на стоки и услуги од земјите од Централна и Источна Европа, како и повеќе кинески инвестиции во зелена енергија.

Според него, поизбалансираните трговски односи ќе послужат како основа за економско закрепнување од пандемијата.

Дуда ја повика Кина да ги отстрани административните бариери за увоз на земјоделски производи од Полска.

Извор:МИА