Даниил Видински избран за нов патријарх на Бугарската православна црква
![](https://www.slobodenpecat.mk/wp-content/uploads/2024/06/vidinski.webp)
Даниил Видински е избран за нов патријарх на Бугарската православна црква. Тој е четврти духовен поглавар од возобновувањето на патријаршијата.
69 од 138 делегати гласале за 52-годишниот Видински кој ја презема власта по смртта на патријархот Неофит во март.
Видински е роден во 1972 година во Смолјан под името Атанас Николов. Завршил средно образование во родниот град, а во 1996 година запишува Англиска филологија на СУ „Св. Климент Охридски“. Веќе следната година се префрла на Богословскиот факултет. Од 1997 година е послушник во Хаџидимовскиот манастир „Св. Георги“, по две години станува монах и е ракоположен за јероѓакон.
Во 2004 година е испратен на послушание во Роженскиот манастир „Рождество Богородично“, каде што е ракоположен за јеромонах, а две години подоцна станува архимандрит. Во 2008 година по одлука на Светиот синод станува епископ во храмот „Св. Александар Невски“. Назначен е за викар последователно на Неврокопскиот митрополит Натанаил и митрополитот на САД, Канада и Австралија Јосиф. На 4 февруари 2018 година е избран за Видински митрополит.