Репрезентативецот на Албанија, Мирлинд Даку на Европското првенство се најде во центарот на вниманието поради скандалозното однесување и пцовките кои ги испрати и кон Македонците по натпреварот со Хрватска.

УЕФА за недоличното однесување му одреди два натпревари суспензија, а откако Албанија го заврши настапот на Европското првенство одлучи одново да зборува за тој инциент.

„По првиот натпревар против Италија, нашиот дефанзивец Хисај доби многу критики од навивачите и медиумите. По мечот со Хрватска сакав да му дадам поддршка и отидов со него на навивачката трибина, за навивачите да го прифатат, да го поддржат и да го споделат моментот на радост со него. Тогаш го зедов мегафонот и ги кажав тие зборови“.

„Навивачите често си дозволуваат да упатуваат навредливи повици до навивачите на други земји и атмосферата ве загрева, тоа влијае на сите на стадионот. Тој меч имаше емотивна завршница, го постигнавме израмнувачкиот гол во последната минута и јас дебитирав на ЕП, емоциите беа многу големи. Но, тоа не го оправдува мојот потег. Веднаш по ова сфатив дека згрешив затоа што изговорив несоодветни зборови. Она што е најважно, не требаше да кажувам такви зборови за ниту еден народ. Тоа е едноставно неприфатливо. Тоа е ужасен чин. Жал ми е, и им се извинувам на сите што беа повредени од оваа постапка“, изјави Даку.

Даку покрај Македонците ги навредуваше и Србите, а бидејќи Албанија на ЕП одигра само еден натпревар по суспензијата тој ќе го пропушти и дуелот на оваа репрезентација од Лигата на Нации во септември.

ВИДЕО | Aлбански репрезентативец ги пцуеше Македонците и Србите по натпреварот против Хрватска

Албанската федерација се огласи за скандалот кој го направи Даку