Средината на четириесеттите години се покажа како период на големи промени, како и раните шеесетти. Можеме да ги забавиме знаците на стареење со начинот на живот, особено со изборот на храна и количината на алкохол што ја консумираме.

Стареењето не е бавен и линеарен процес, откриваат новите истражувања на научниците од „Стенфорд“. Имено, стареењето, особено забавувањето на метаболизмот и појавата на брчки, се случува во таканаречените „бранови поврзани со стареењето“, а не како постепен процес. Студијата објавена во списанието „Природно стареење“ (Nature Aging) откри дека молекулите во телото, како и микробите и бактериите кои ја сочинуваат цревната микробиота, поминуваат низ брзи промени во две клучни фази: на возраст од 44 и 60 години.

– Не се менуваме само полека, како што минува времето, туку притоа се случуваат некои крајно драматични промени – изјавил Мајкл Снајдер, доктор на науки, професор по генетика на Универзитетот „Стенфорд“ и еден од истражувачите, во извештајот на универзитетот.

– Се покажало дека средината на четириесеттите бил период на големи промени, како и раните шеесетти. И тоа важи без разлика кои молекули ги набљудувале – додал тој.

Промените на молекуларно ниво, кога се случуваат најголемите осцилации во бројот на молекулите и микробите, влијаат на ризикот од хронични болести, способноста за борба против болестите, како и темпото на стареење, покажуваат резултатите од студијата.

Промените што се случуваат во четириесеттите се поврзани со болестите на срцето, функцијата на кожата и мускулите, како и со начинот на кој телото ги метаболизира кофеинот, мастите и алкохолот.

Промените во шеесеттите играат улога во оксидативниот стрес, здравјето на имунолошкиот систем, срцевите заболувања, метаболизмот на кофеинот, болестите на бубрезите и стареењето на кожата и мускулите. Ова се вклопува во 12 клучни карактеристики на стареењето, како што се хроничното воспаление и стареењето на клетките, кои се јавуваат на молекуларно ниво како што луѓето стареат.

Ова истражување ја објаснува и поголемата чувствителност на постарите лица на алкохол, зголемување на телесната тежина поврзана со возраста и губење на мускулната маса.

Научниците проучувале повеќе од 100 волонтери на возраст меѓу 25 и 75 години кои дарувале крв или други биолошки примероци на секои неколку месеци речиси две години. Анализирани се промените во повеќе од 135.000 молекули и микроби.

Авторите на студијата заклучија дека огромното мнозинство на молекули и микроби, 81% од нив, не се менуваат линеарно со возраста на поединецот. Најбрзите промени се забележани во средината на четириесеттите и почетокот на шеесеттите години, кај мажите и кај жените.

„Ова сугерира дека иако менопаузата или перименопаузата може да придонесат за промени кај жените во средината на 40-тите години, веројатно постојат други, позначајни фактори кои влијаат на овие промени кај двата пола“, рекол Ксијаотао Шен, доктор, автор на студијата и доцент на Универзитетот „Нанјанг“ во Сингапур, во соопштението од „Стенфорд“.

Идентификувањето и проучувањето на овие фактори треба да биде приоритет за идните истражувања, заклучи тој.

Механизмите кои објаснуваат зошто се случуваат брзи молекуларни промени во овие два клучни периоди се во голема мера непознати.

Студијата ги следеше податоците само во период од две години и испраќа јасна порака: треба да се посвети посебно внимание на здравјето во средната возраст за да се бори против молекуларните промени кои се надвор од ваша контрола.

Тоа значи редовен тренинг на силата за да се спречи губење на мускулите, секојдневно вежбање за намалување на ризикот од срцеви заболувања и јадење хранлива, целовита храна за да се намали метаболичкото забавување, пишува мсн.