Бројот на загинати од ураганот Хелена, кој го погоди југоисточниот дел на САД, се искачи на 116, оставајќи илјадници луѓе без покрив над главата во погодените области.

Официјалните лица брзаат да испорачаат основни материјали за настраданото население, да го обноват снабдувањето со електрична енергија и да ги расчистат блокираните патишта, пренесува „Си-би-ес- њуз“.

Ураганот Хелена предизвика огромно уништување и ја исклучи електричната енергија за неколку милиони луѓе.

Невремето во четири часот навечер го погоди крајбрежното подрачје кај Биг Бенд, Флорида, а Хелен е третиот ураган што ја погоди областа во последните 13 месеци, пренесува Танјуг.

Американскиот претседател Џозеф Бајден во неделата вечерта доби извештај за последиците од разорната бура на огромен дел од јужниот дел на САД и најави дека оваа недела ќе ги посети областите погодени од ураганот.

Белата куќа објави и дека потпретседателката Камала Харис ќе ги посети областите погодени од невремето „што е можно поскоро“.

Потпретседателката на САД одлучи да ја прекине кампањата во сојузната држава Невада и денеска да се врати во Вашингтон на брифинг за одговорот на последиците од ураганот Хелена, соопшти Белата куќа.