Спасувачките екипи во западниот дел на Северна Каролина се обидуваат да стигнат до луѓето чија судбина сè уште е непозната, три дена откако ураганот Хелен го опустоши југоисточниот дел на САД.

Бројот на жртвите од невремето во шест држави се искачи на 120, а милиони луѓе останаа без струја и без пристап до интернет, јавува Гласот на Америка.

Во тешко погодениот планински округ Бамкомб во Северна Каролина, каде што се наоѓа градот Ешвил, загинаа 35 лица, изјави локалниот шериф во понеделникот.

Залихите на вода и храна беа доставени со хеликоптери и авиони до жителите на областите кои останаа изолирани поради поплавите и прекините на електричната енергија.

Гувернерот на Северна Каролина, Рој Купер, предвиде дека бројот на жртвите ќе се зголеми бидејќи спасувачите се приближуваат до областите отсечени од урнатите патишта, оштетената инфраструктура и големите поплави.