Британка доживеала шок: „Седнав во авионот за Париз, брзо заспав, а кога се разбудив – тоа не е Ајфеловата кула!“
![](https://www.slobodenpecat.mk/wp-content/uploads/2024/06/Dzem-Mejbenk-Pariz-Foto-Printskrin-Instagram-EPA-EFE_YOAN-VALAT.jpg)
Патничката Џем Мејбенк (30) од Западен Јоркшир, Британија, немала поим што ќе се случи со неа додека се качувала во авионот на „Рајанер“, кој од аеродромот „Лидс-Бредфорд“ требало да ја однесе во Париз. Таа поминала, како што верувала, низ правилниот излез, каде што персоналот на аеродромот го скенирал и го проверил нејзиниот авионски билет.
Кога се качила во авионот, сфатила дека нејзиното седиште 34А не постои. Таа тврди дека екипажот во кабината ѝ рекол дека тоа понекогаш може да се случи при префрлување на летовите.
Џем удобно се сместила на своето доделено место во авионот и се препуштила на летот, кој, наместо предвидениот еден час, траел два часа. Подолгото летање мислела дека има врска со турбуленциите и не се вознемирила премногу, па сепак ѝ почнал одморот. Таа не слушнала никакво предупредување од пилотот или некој од екипажот и брзо заспала и го преспала целиот лет.
Ги отворила очите, кога – изненадување! Џем низ прозорецот гледала во палми и планини додека нејзиниот авион слетувал.
„Ова не изгледа како Ајфеловата кула, а ниту како Париз“, помислила во тој момент, прераскажувајќи ја случката подоцна за „Дејли мејл“. Дури тогаш сфатила дека случајно се качила на погрешен лет за Аликанте, Шпанија, а не за Париз.
Мејбенк признала дека никогаш порано не била во Аликанте.
Таа чекала сите да излезат од авионот, а потоа отишла кај член на кабината на „Рајанер“ и му објаснила во каква ситуација се нашла. И понатаму била збунета како ѝ се случило такво нешто и претпоставувала дека погрешно го прочитала бројот на излезот на аеродромот.
Вработените, исто така, биле многу збунети и не разбрале како се случило тоа.
„Ми рекоа дека тоа никогаш порано не им се случило, но ми средија подоцнежен лет за Париз, што е добро“, изјавила 30-годишната девојка за „Дејли мејл“, која, по пристигнувањето во Париз, одлучила максимално да го искористи своето време таму и веднаш се упатила на разгледување и шопинг.