Шефот за надворешна политика на ЕУ, Жозеп Борел, во петокот во седиштето на ОН рече дека „никој“, дури ни САД, „се чини дека може да го запре“ израелскиот премиер Бенјамин Нетанјаху во војните со Хамас во Газа и Хезболах во Либан.

„Го вршиме целиот дипломатски притисок за прекин на огнот. Но, се чини дека никој не е способен да го запре Нетанјаху ниту во Газа, ниту на Западниот Брег“, изјави високиот претставник на ЕУ за новинарите по состанокот на Советот за безбедност на ОН.

Претходно, од говорницата на Генералното собрание на ОН, израелскиот премиер се закани дека ќе го погоди Иран доколку неговата земја биде нападната, истовремено ветувајќи дека ќе продолжи со нападите против палестинскиот Хамас во Газа и проиранскиот Хезболах во Либан додека не стигне до победата.

Израелските вооружени сили (ИДФ) започнаа низа воздушни напади во текот на ноќта во петокот кон саботата во јужните предградија на Бејрут и други области на Либан, неколку часа по нападот врз „штабот“ на Хезболах.

Ескалацијата предизвика меѓународна загриженост. „Ние се движиме кон долга војна“, предвиде Борел, кој во понеделникот предупреди дека Либан е „на работ на целосна војна“.

Неколку недели пред претседателските избори во САД, каде ќе се соочат Камала Харис и Доналд Трамп, ситуацијата на Блискиот Исток бара мобилизација на меѓународната заедница, нагласува шефот на европската дипломатија.

„Не можеме да се потпреме само на САД. Тие се обидоа многу пати и не успеаја“, додаде тој.