Американскиот државен секретар Ентони Блинкен денеска одговори на критиките за настапот на претседателот Џо Бајден на предизборната дебата минатата недела, истакнувајќи дека политиката на Бајден во последните три и пол години ја зајакнала довербата во американското лидерство во светот.

Блинкен беше прашан за време на настан во Институтот „Брукингс“ што ќе си помислат пријателите и непријателите на САД за американското лидерство по слабиот настап на Бајден.

Американскиот државен секретар рече дека луѓето во светот гледаат што Бајден направил од неговото доаѓање на власт, а не само неговиот настап во вечерта на дебатите и дека ја ценат неговата политика.

Блинкен истакна дека луѓето гледаат претседател кој ги вратил позициите на Америка, ја вратил Америка на светската мапа, обновил сојузи и партнерства.

– Ако ги погледнете социолошките истражувања во светот, до степен до кој може да им се верува, ќе видите повторно и повторно дека довербата во американското лидерство значително се зголемила во последните три и пол години, истакна тој.

„Тоа не се случува само по себе /…/ Тоа е резултат на политиката што ја водиме, резултат на нашата ангажираност. Тие гледаат дека претседателот Бајден го отвора патот во сите овие различни области на начин што ги обединува луѓето и е фокусиран истовремено на предизвиците што стојат пред нас и кои се заеднички за толку многу земји, додаде Блинкен.

Поддржувачите на Бајден се надеваа дека предизборните дебати ќе ги разбијат сомнежите дека тој е премногу стар за уште еден претседателски мандат, но наместо тоа, неговиот настап дополнително ги разгоре сомнежите. Некои демократи дури повикаа Бајден да биде заменет со друг кандидат.