Вицепремиерот за економски прашања Фатмир Битиќи го потврди она за што денеска пишуваше „Слободен печат“ – дека се размислува за промена на моделот за раст на пензиите.

Според него, сегашниот модел не обезбедува достоинствен раст на примањата за пензионираните граѓани.

Во гостување на „24 анализа”, Битиќи истакна дека пензиите ќе растат паралелно со минималната плата.

– Решение може само низ конструктивен дијалог. Кај минималната плата осигуруваме дека и наредните години ќе растат и кај пензиите исто така ќе има раст. Во делот кој разговараме е моделот со кој пензискиот фонд да се одржи стабилен и одржлив за да може од него да се добиваат пензии и наредните пензионери. Не сум научен да играм со проценти и со решение во кои не гледам доследна анализа. Предвидливоста ќе ја имаат до 2026. Сакаме решенија со кои ќе им овозможиме достоинствен живот. Сметам дека пензискиот фонд осигурува доволно стабилен приход за да се обезбеди пораст на пензиите, нагласи Битиќи.