Одговарајќи на новинарско прашање денеска на прес-конференција, Фатмир Битиќи од СДСМ рече дека во сите анкети, над 75 проценти од граѓаните велат дека се за членство во ЕУ и дека политичарите имаат обврска да носат одлуки за да одговорат на нивното очекување.

„Владата треба да каже кој е нивниот план. На власта беше да ги подобри условите како што ветуваше. И сегашната партија ВМРО-ДПМНЕ нема добиено повеќе од 25 отсто од вкупниот број граѓани на изборите. Легитимитетот на изборите не мора да значи дека се носат добри одлуки. Но, и да прифатиме дека е тоа така, нивно беше да ги сменат условите. Да го сменат и Францускиот предлог, да ја сменат и Преговарачката рамка, и да го вратат името. Очигледно гледаме сценарио во кое, за жал, продолжува стариот манипулативен приод на оваа гарнитура, да изманипулираме што можеме за избори, а после кога ќе ја добиеме власта ништо од тоа не важи“, рече Битиќи.

Тој додаде дека во седмицата што претстои изминуваат 100-те дена од формирањето на Владата и дека на следните пратенички прашања власта треба „да дојде со план каде ќе се движи Македонија во наредните години, кога е очигледно одвојувањето на европскиот пат од другите земји“.

На ставовите на Битиќи одговорија од ВМРО-ДПМНЕ:

„Придонесот на СДС за ЕУ е раздвојување на Албанија од Македонија, за чии интереси работи Битиќи? СДС е партијата која произлезе од КПМ, тоа е партија која секогаш е против европските интеграции и партијата заради која сме заглавени во нашиот пат кон ЕУ. СДС свесно ја спои земјата со Албанија, а после работеше се за раздвојување. СДС ликува затоа што Македонија е заглавена. СДС со години ја држеше државата како мафијашка фавела, за да може да прават криминал и корупција. Затоа и сега Македонија е заглавена“, велат од владејачката партија.