Бидете искрени: Начини на кои можете да му кажете на партнерот дека не доживувате оргазам
Иако голем број жени не доживуваат редовно оргазам за време на сексот со партнерот, повеќето од нив не зборуваат за тоа, пишува „Љепота и здравље“.
Бројни студии покажаа дека повеќе од 90 отсто од мажите редовно ја достигнуваат кулминацијата за време на сексот, додека меѓу 50 и 70 отсто од жените – не. Она што обично ги тера жените да молчат за тоа е фактот што многу од нив мислат дека нешто не е во ред со нив. Стравот, срамот, необразованоста и недоволната свест и самодоверба често доведуваат до тоа жените да се согласуваат на секс без оргазам со години.
Истражувањата покажаа дека повеќето жени не доживуваат оргазам бидејќи им е потребен директен контакт со клиторисот за време на пенетрацијата. Но, дури и оние жени кои се свесни за тоа често одбиваат да разговараат за тоа со својот партнер.
Доколку сте меѓу нив, подолу ви пренесуваме три совети кои ќе ви помогнат да се ослободите и отворено да разговарате со партнерот за оргазмот.
Партнерот не може да ви ги чита мислите
Без разлика дали станува збор за секс или одење во кино, вашиот партнер не може да знае што сакате. Искреноста треба да биде основа на секоја врска, а партнерот личност која ве поддржува и не ве осудува. Бидете отворени со партнерот и кажете му дека не можете да доживеете оргазам и дојдете до заедничко решение за тој проблем. Исто така, ако знаете како можете да достигнете кулминација – не плашете се да му покажете или да му кажете на вашиот партнер.
Еднаквост постои и во креветот
Ако еднаквоста постои во другите сфери од вашиот заеднички живот, таа мора да постои за време на сексот. Сексот кој постојано завршува само со неговиот оргазам всушност не е секс. Мора да знаете дека секој заслужува оргазам и дека другата страна со ваша помош и водство мора да се потруди да го добие.
Незнаењето не е срамно
Голем број возрасни не знаат ништо за човечката анатомија. Мажите често не знаат како функционира женското тело, а понекогаш и жените не знаат. Не се срамете од незнаењето на вашето тело или она на партнерот. Заедничкото проучување може да биде одлична предигра. Истражете го вашето тело и телото на вашиот партнер, вклучете го во тоа истражување и дозволете си да станете поблиски на овој начин.