Бендевска се заколна во РС Македонија, Митрески во Република Северна Македонија
Пратениците денеска на пленарна седница ги избраа Антонијо Милошоски од ВМРО-ДПМНЕ, Јован Митрески од опозициската СДСМ и Весна Бендевска од владејачката ЗНАМ за потпретседатели на Собранието.
Антонијо Милошоски поради здравствени причини не присуствуваше на седницата и како што информира претседателот на Собранието Африм Гаши, тој во следната прилика ќе даде свечена заклетва како потпретседател на Парламентот.
За Милошоски гласаа 69 пратеници, за Митрески се изјаснија 82 пратеници, а за Бендевска 70.
Гаши заклетвата дека потпретседателите при вршење на функцијата ќе го почитуваат Уставот и законите на Република Северна Македонија ја читаше на македонски јазик. Бендевска заклетвата ја изговори со РС Македонија, додека Митревски ја повтори како што претседателот Гаши ја прочита Република Северна Македонија.
Впечаток е дека функционерите во зависност на тоа на која партија и припаѓаат и пред се дали го прифаќаат уставното име, прават варијации на свечената заклетва за да не го употребат уставното име Република Северна Македонија.
Претходно на инаугурацијата за претседателка на државата, Гордана Сиљановска-Давкова во заклетвата изговори само Македонија, без придавката Северна, но и без Република.