Бајден свика самит за поддршка на Украина во Германија
Американскиот претседател Џо Бајден ги покани лидерите на повеќе од 50 земји кои ја поддржуваат Украина на самит во Германија.
„Ќе ги поканам лидерите на Контакт групата за одбрана на Украина следниот месец да разговараат за координацијата на поддршката на повеќе од 50 земји за Украина за одбрана од руската агресија“, изјави американскиот претседател, пренесува ДПА.
Со истата најава, во пресрет на средбата со украинскиот претседател Володимир Зеленски во Вашингтон, тој најави уште осум милијарди долари американска помош за Киев.
Пакетот вклучува уште една постројка на системот за воздушна одбрана „Патриот“, наведувани бомби со долг дострел и беспилотни летала.
На 10 октомври Бајден ќе отпатува во тридневна посета на Германија. Тој ќе се сретне со канцеларот Олаф Шолц и со претседателот Франк-Валтер Штајнмаер.
Потоа ќе одат во американската воздухопловна база Рамштајн. Белата куќа сè уште не објави детали за планираниот самит, но се верува дека тој ќе се одржи во базата.
Таканаречената Рамштајн група, под водство на САД, веќе одржа многу состаноци таму за да ја координира помошта за Украина.