Австријци ќе го градат првиот ски-центар во Албанија
Албанскиот премиер Еди Рама најави изградба на првиот ски-центар во земјата.
– Ова ќе биде првиот ски-центар. Владината намера е Албанија да ја претвори во туристичка дестинација и за зимската, а не само летната сезона – најави Рама во поткастот „Зборуваме”.
За изградба на комплекс во Корча се заинтересирани „многу сериозни инвеститори“ од Австрија.
– Наскоро, со Божја помош, никогаш не се знае што ќе се случи следниот ден во овој живот, ќе почнеме со изградба на првиот ски-центар кој ќе биде во областа на Корча. Станува збор за фантастичен проект од група многу сериозни инвеститори од Австрија – најави Рама.
Според него, и архитектите се Австријци, автори на најпознатите одморалишта во Австрија и Швајцарија.
Наведувајќи дека Албанија годинава ја посетиле над 8,5 милиони туристи, премиерот оцени дека „како резултат на визијата на владата и вложувањата, неговата земја станала барана дестинација“.