Атина со остра порака до Скопје и Тирана: Вашите акции не помагаат на патот кон европското семејство
![](https://www.slobodenpecat.mk/wp-content/uploads/2024/07/12344571.jpg)
Грчкиот министер за надворешни работи, Јоргос Герапетритис, на средбата со неговиот австриски колега Александар Шаленберг во Атина, ги нападна Скопје и Тирана.
– Акциите што укажуваат на иредентистички тенденции и кои ги поткопуваат наместо да ги зајакнуваат добрососедските односи, не помагаат на патот кон европското семејство – рече шефот на грчката дипломатија по средбата со неговиот австриски колега.
Тој ги повика соседните земји Северна Македонија и Албанија да ги почитуваат трите клучни обврски: целосно спроведување на европското законодавство, почитување на принципите на демократијата и владеењето на правото и верно и безусловно спроведување на меѓународните договори и на меѓународното право воопшто и потсети дека европскиот курс на Западен Балкан започна од Солунскиот самит во 2003 година:
– За жал, неодамна доживеавме јасни прекршувања од политичкото и државното раководство на Северна Македонија во однос на Договорот од Преспа. Посебно што се однесува на уставното име на државата, кое е предвидено да се користи без никакво отстапување и без никаква можност за измена, да биде Северна Македонија пред сè, и внатре и надвор. И нема апсолутно никаква двосмисленост околу ова прашање. Така лицето кое има институционална улога при присуство во јавноста не смее да користи друго име од она што е предвидено во договорените услови – нагласи Герапетритис.
Тој упати и порака до Албанија во однос на затворската казна на градоначалникот на Химара, Фреди Балерис, кој патем е избран за европратеник, како и за резултатите од пописот во Албанија во делот на грчкото и православното население.
-Грција навреме се позиционираше по прашањето за притворот на избраниот градоначалник Фредис Белерис. Очекуваме Албанија да го направи очигледното. Да се почитува европското право, кое бара можност избраниот член на Европскиот парламент да ги преземе своите должности и целосно да учествува. Се разбира, во овој контекст, би сакал да ја изразам резервираноста на Министерството за надворешни работи во однос на интегритетот на пописот што е спроведен во Албанија. Првите резултати ги истакнуваат сериозните проблеми со пописниот процес, што фрла сомнеж врз самите резултати. Припадниците на грчкото етничко малцинство веќе сведочеа и се повикаа на нив. Има проблеми со начинот на кој се спроведе овој попис. Очигледно е предуслов за европскиот курс на секоја земја да ја почитува точноста на податоците. И бараме од сите земји строго да се почитуваат овие правила – рече Герапетритис.
Пописот на населението и домовите во Албанија беше завршен во ноември 2023 година и дури на крајот на јуни 2024 година беа објавени првичните резултати, додека локалните резултати и податоци ќе бидат објавени на крајот на 2024 година.
– Веќе имаше реакција од сите малцинства во Албанија, додека криза беше предизвикана и во односите со Северна Македонија, пред сè поради тоа што надлежната статистичка служба ИНСТАТ регистрираше „северномакедонско малцинство“, а во исто време ги прифати како бугарско малцинство оние Македонци кои извадиле бугарски пасош – пишуваат грчките медиуми.