„Арбериа дизајн“ пак ќе ја организира прославата на Рамковниот, а „Скопје филм Студио“ Илинден, 8 Септември…
Традицијата продолжува, фирмата „Скопје филм Студио“ ги доби тендерите за организација на четирите државни празници до крајот на годинава, а тетовската фирма „Арбериа дизајн“ ќе ја организира прославата на годишнината од Охридскиот рамковен договор и, како и на Денот на албанската азбука.
Според договорот што е објавен од Бирото за јавни набавки „Скопје филм Студио“ која била единствен понудувач на огласот, ќе добие околу половина милион евра за организација на прославата на утрешниот празник 2 Август – Денот на Републиката, како и за 8 Септември – Денот на независноста, 11 Октомври – Денот на народното востание и за 8 Декември – Ден на Св. Климент Охридски.
Според договорот, фирмата ќе добие околу 350 илјади евра за „осмислување и реализација на активности кои ќе обезбедат креативна, продукциска, техничка и организациска поддршка за реализација на настани за одбележување“ на овие четири празници и уште околу 150 илјади евра за настан во врска со регионалната иницијатива Отворен Балкан.
И ако оваа фирма е „резервирана“ за организирање на прослави на повеќето државни празници, фирмата „Арбериа дизајн“ е изборот на Министерство за политички систем и односи меѓу заедниците на првиот вицепремиер Артан Груби за организирање на 22-годишнината од Охридскиот рамковен договор на 13 август, која патем е и единствен понудувач исто како и лани.
Бирото за јавни набавки објави дека за хотелски и угостителски услуги, како и за креатива, тетовската фирма ќе добие околу 100.000 евра за два договора од еден ист оглас. Првиот е за услуги најмногу до 4.200.000 денари или 70.000 евра и се однесува главно на обезбедување хотелски, кетеринг и услуги поврзани со опрема за органирање настани, а вториот за услуги до 1.800.000 денари, односно околу 30.000 евра за логистичка и креативна поддршка. Во понудата која што е составен дел од вториот договор, „Арбериа дизајн“ ќе добие околу 5.000 евра за концепт за организирање на настан за 22-годишнината од Рамковниот договор, а слична сума ќе добие и за „стихотворба од реномиран поет, музички аранжман и аудиозапис на песна“ по повод годишнината. За продукција на спот за песната се предвидени околу 4.000 евра, додека за аудио-визулен спот за постигнувањата на Охридскиот договор се одвоени околу 6.000 евра.
Инаку, „Арбериа дизајн“ лани го доби тендерот за печатење на свидетелствата вреден 130.000 евра, а меѓу другите годинава ги организираше и настаните за ставање камен темелник на автопатите од коридорите 8 и 10д во Тетово и Прилеп.