Ангажираните уметнички концепти на Лиа и Дан Пержовски се претставени во МСУ
Реномираните уметници Дан и Лиа Пержовски со специфичен уметнички концепт се претставуваат во Музејот на современата уметност (МСУ) во Скопје. Изложбата беше отворена на 26 септември, а кураторка на проектот е Мира Гаќина.
Дан Пержовски, чие изразно средство е цртежот, се претставува со проектот „Обновени вести“ (ReNews), фокусиран на актуелните општествени и политички настани преку оригинална визуелна перспектива. Проектот вклучува компоненти, како што се стрипови, колажи и слики кои на интензивен начин ја истражуваат и визуелизираат комплексноста на современата политика и општество.
Дан Пержовски се фокусира на тоа како медиумите и информациите влијаат на нашето разбирање на светот, и „Обновени вести“ е негов обид да ги истражи и предизвика традиционалните наративи и начин на известување. Со тоа, ги поттикнува гледачите да размислуваат за информираноста, пропагандата и моќта на медиумите.
– Моите цртежи се инспирирани од медиумите, особено од печатените медиуми. И многу често преку цртежот ја визуализирам сржта, она што е нагласено во информацијата. Теми како војна, емигрантски кризи, богати наспроти сиромашни… се теми што постојано се повторуваат во различни околности – објасни Дан Пержовски.
Лиа Пержовски е истражувачка, уредничка и концептуална уметница која се претставува со проектот „Сет за преживување (избор од Музејот на знаењето)“ во кој истражува концепти поврзани со знаењето, образованието и социјалните структури преку серија интерактивни и концептуални дела.
Проектот вклучува различни медиуми и формати, како графики, објекти и документи. Оваа селекција е изработена како обид да се создаде едукативен ресурс, кој преку визуелната уметност ги истражува и предизвикува размислување за историјата, културата и секојдневниот живот.
– Во мојот изложбен простор креирав две институции, архива од современата уметност и музеј на знаењето. Денес светот живее во хибридна војна, освен воените жаришта, тука се и пандемиите, глобалното затоплување… Затоа изложив објекти – неопходен сет за камуфлажа и преживување. Но, она што им е најмногу потребно на луѓето денес е знаењето. Земјите се менуваат многу брзо, затоа треба да бидеме адаптибилни и покреативни. Во рамките на изложбата направив и времеплов на уметноста од нејзините почетоци до денес. Изложбата е повеќеслојна и, покрај уметноста и знаењето, се занимава и со аспектите што го градат идентитетот на еден човек – посочува Лиа Пержовски.
(Текстот е објавен во „Културен печат“ број 249, во печатеното издание на весникот „Слободен печат“ на 28-29.09.2024)