Израел и Иран се две големи регионални воени сили и секогаш кога постои закана од конфликт меѓу овие непријателски земји и најголемите ривали на Блискиот Исток, се поставува прашањето кој е посилен кога станува збор за воените ресурси.

Израелската армија е релативно помала, но технолошки исклучително напредна и добро опремена. Иран, од друга страна, има супериорност во бројот на војници и бројни вооружени системи, како што се артилерија или тенкови, но неговите вооружени сили се потпираат на застарена технологија во области како што се воздухопловните сили.

Вкупните бројки за воената моќ на овие земји варираат од извор до извор, а различни се и критериумите за проценка на реалните воени способности. Овие податоци беа објавени од Меѓународниот институт за стратешки студии (IISS).

Залихите на балистички ракети, најголемата сила на Иран

Што се однесува до вкупната воена сила на Иран, според веб-страницата Global Firepower, која ги анализира податоците за воената моќ, вооружувањето и воените способности на земјите, Иран е на 14-тото место по сила од 145 анализирани земји, додека Израел е на 17-тото место. Иран има еден од најголемите арсенали на балистички ракети на Блискиот Исток, како што пишува Њујорк тајмс, повикувајќи се на експерти. Залихите на балистички и крстаречки ракети под команда на моќната иранска револуционерна гарда треба да бидат нејзината најголема сила.

Има и хиперсонични проектили – Иранската државна телевизија објави дека нападот во вторникот врз Израел е првпат иранската војска да употреби хиперсонични ракети Фатах. Иранската програма за развој на беспилотни летала не треба да се заборави, а кога станува збор за воздушната моќ, тоа е застарена флота со авиони стари 50 и повеќе години, а многу од нив не се оперативни поради недостаток на резервни делови.

Од друга страна, меѓу експертите има и тема за доверливоста на иранските ракети – американското разузнавање проценува дека околу половина од иранските ракети не успеале при лансирањето или во лет за време на нападот врз Израел во април.

Додека западните санкции значително влијаат на обидите на Иран да ги модернизира застарените гранки на војската и ресурсите, Израел има најнапредно и најсофистицирано оружје во сите гранки на вооружените сили – на копно, море и во воздух. Напредните борбени авиони на Израел и даваат на земјата особена воздушна супериорност, но Израел се уште се соочува со неколку пречки во таа област, велат експертите, вклучително и недостиг од воздушни танкери за полнење гориво.

Иранските воздухопловни сили се особено ранливи, барем во потенцијален конфликт со Израел. Се верува дека Иран има само неколку функционални напаѓачки авиони, вклучително и некои руски млазни авиони и американски „стари“ авиони Ф-4 и Ф-5, купени пред 1979 година. Севкупно, Иран наводно има една ескадрила од девет авиони Ф-4 и Ф-5, една ескадрила руски авиони Су-24, неколку МиГ-29 и неколку Ф-7 и Ф-14. Истовремено, Израел има стотици модерни американски Ф-15, Ф-16 и Ф-35.

Кога станува збор за самите човечки сили, треба да се земе предвид дека Иранците се една од најмладите популации во светот и брои близу 90 милиони луѓе, додека Израелците околу 10 милиони. Кога станува збор за Иран, треба да се направи разлика помеѓу традиционалната армија и Корпусот на иранската револуционерна гарда (IRGC), кој се смета за доминантен и клучен елемент на воената моќ на Иран. Се проценува дека израелскиот воен персонал е вкупно околу 640 илјади луѓе, од кои 169.500 се активни војници.

Железна купола и ирански дронови

Експертите сметаат дека во случај на конфликт, Израел би имал воена супериорност, и на офанзива и на одбранбен план, но дека не треба да се игнорира заканата од иранскиот арсенал на беспилотни летала и ракети, и покрај израелскиот исклучително моќен систем за противвоздушна одбрана, во кој посебно место зазема – Железна купола.

И покрај тоа што со децении беше под различни санкции, Иран инвестираше многу во развојот на својата домашна програма за оружје, што резултираше со евтини и ефективни беспилотни летала, како и гореспоменатите напредни балистички ракети. Иранските борбени и самоубиствени беспилотни летала, од друга страна, би можеле да „нанесат хаос меѓу цивилното население“ доколку бидат истрелани во голем број.

Нуклеарни арсенали

Арман, ракетен фрлач поставен на камион кој беше претставен во 2022 година, треба да соборува балистички ракети, за кои ниту едно од руските оружја кои моментално се активни во Иран не е способно. Истата година беше претставен Азаракш, покомпактен ракетен фрлач дизајниран за беспилотни летала.

Во секој случај, според бројните експертски проценки, Израел секако ја задржува воената надмоќ. Покрај оперативната и разузнавачка предност на Израел во однос на Иран, тој има и нуклеарно одвраќање. Иако земјата никогаш не го потврди тоа, се верува дека Израел поседува нуклеарно оружје, а Иницијативата за нуклеарна закана со седиште во Вашингтон проценува дека Израел има околу 90 нуклеарни боеви глави.

Со години имаше гласини дека Иран се обидува да изгради нуклеарен арсенал, но тие никогаш не беа потврдени.

Границите на овие земји се оддалечени повеќе од 900 километри една од друга. Повеќето од иранските воени бази и нуклеарни постројки се наоѓаат на повеќе од 2.000 километри од Израел. Затоа, за напади длабоко во Иран, Израел ќе мора да користи американски авиони Ф-15и и авион Ф-35и Адир.

Поморски сили

Освен авиони, Израел на располагање има и германски дизел подморници од класата „Делфин“, кои експертите ги сметаат за идеални за операции на крајбрежјето. Двете најнови подморници изградени за Израел се опремени со систем AIP (воздух независен погон), односно погон кој не бара воздух и им овозможува да останат под површината неколку недели. Подморниците „Делфин“ се вооружени со верзија на крстаречката ракета за напади врз копнени цели.