Во трката за нов универзален снабдувач со струја се три компании од кои веќе се пристигнати понуди. Постапката е во тек, соопшти министерот за економија Крешник Бектеши и додаде дека Комисијата работи и до крајот на април ќе биде донесена соодветна одлука од Владата, а граѓаните ќе добијат снабдувач согласно законските рокови. Министерот повтори дека Регулаторната комисија веќе се изјаснила за надоместокот за пристап до мрежа, кој „ненајавено се појави на декемвриските сметки“.

-ЕВН има обврска да го укине овој трошок во јануарските сметки, бидејќи тој не беше предвиден за декември – додаде Бектеши.

Министерот за економија изјави дека цените на струјата во блоковите се многу транспарентно објавени на веб страна на РКЕ и тој лично не верува дека декемвриските сметки на граѓаните се зголемени повеќе од утврденото.

-Но, граѓаните имаат право на жалба до РКЕ и ако има грешка или злоупотреба веднаш ќе се исправи – одговори Бектеши на новинарска забелешка дека дел од граѓаните добиле превисоки сметки за струја.

Од Бектеши и информацијата дека до 1 јули нема да има нови повисоки цени на струјата за блоковите, бидејќи според Законот за енергетика, цените се одредуваат два пати годишно.

-Каква ќе биде одлуката по 1 јули, никој не може да каже. Но, ќе потсетам дека согласно сите параметри енергетската криза е целосно стабилизирана, а ние како Министерство за економија не сме објавиле дека има криза. Сите заложби на компаниите редовно се одвиваат и по 1 јули не очекуваме да има зголемување на цената на електричната енергија – кажа Бектеши на прес-конференција во Владата.