Аеродром ќе дава мали грантови на граѓански организации за управување со отпад од пакување
Општина Аеродром објави повик за доделување мали грантови за граѓанските организации за одржливо управување со отпад од пакување. Целта на повикот е, како што велат оттаму, да се променат навиките на локалното население за селектирање отпад од пакувања во своите домаќинства и да се научат на правилна селекција на отпадот, пред сè, на пластика и на лименки.
Вкупниот износ на финансиските средства за грантот изнесува 25.000 евра кои се обезбедени преку проектот финансиран од Европската Унија „Clean AirDrom – нула цврст отпад во Општина Аеродром“, а минималната вкупна сума што може да ја добие една граѓанска организација е 2.500 евра, додека максималниот износ по грант изнесува 5.000 евра во денарска противвредност.
Јавниот повик е отворен за граѓански организации што се формално регистрирани на територијата на Град Скопје најмалку 2 (две) години пред објавата на овој повик. Предност ќе имаат оние организации што во својата мисија и статут имаат заложби за зајакнување на заедниците за одржливо управување со отпад и кои во својот фокус ги имаат младите. Проектите може да бидат со времетраење од 3 месеци, односно да се спроведат во периодот од ноември 2024 година до јануари 2025 година. Предлог-проектите мора да се спроведуваат исклучиво на територијата на Општина Аеродром – објаснуваат од Аеродром.
Рокот за поднесување на предлог-проектите е до 16 октомври, најдоцна до 15: часот во Архивата на Општина Аеродром или електронски преку е-адресата [email protected].